LitNet | KOBUS! se Siviele Ongehoorsaamheid

Dis bykans drie jaar sedert hierdie metaalmanne in Afrikaans se laaste album (100% Skuldgevoelvry) die eerste keer deur luidsprekers gebulder het. Hierdie nuwe stuk werk deur Francois Breytenbach Blom en Theo Crous is verbryselend.

Dis harder as Metusalem se groottoonnaels. Elke snit sny deur jou skedel met witwarm kitaarsnare en blitsige dubbelbasdromstukke – dis swaar, bebliksemd en vreesloos. In die lewe het Afrikaans nog nooit so in sy dik metaaljas geklink nie. En jy gaan dalk ‘n rukkie neem voor jy presies sien en hoor wat KOBUS! doen – tussen die kitaarplukke en Francois Breytenbach Blom se grillige mangelbrulle.

Dis egter nie iets wat jou die verderf in gaan lei nie. Dis ‘n waarskuwing. Soos Rammstein se “Mein Teil” op hulle wilde Volkerball DVD. Met sy bloedbesmeerde gevreet en slagtersmesmikrofoon skreeu Till Lindemann hard en duidelik: “Mense, moenie so zef wees om aan ander mense te gaan staan en vreet nie. SIES MAN!”

Daar is tien snitte. “Witman” is reeds onder die ou aanhangers ‘n gunsteling. Dit ruk jou aan die lieshare rond.

Witman loop deur die nuwe era strate

Honger in die sakke en vloeke in die mond

Witman kyk na die vrygestelde slawe

Vergete monumente, Bloedrivier, Godsverbond

Witman loop met ‘n swart agorafobia

Soli deo Gloria, strate van Pretoria

Witman se toekoms lyk al meer lagwekkender

Laat in die nag lê hy wakker wakker wakker wakker

Witman loop deur die Trellidor utopia

Volkskonsentrasiekamp, onbewus euforia

Witman loop ongemaklik in sy vel

Elke tree wat hy gee ‘n bietjie nader aan die hel

Witman nihilisties, witman fatalisties

Kripties pessimisties oor die mensdom dom dom

Witman se toekoms lyk al meer skrikwekkender

sy hart tik tik soos ‘n tydbom bom bom

Witman voed op die oorskiet van verlede dae

Oplossings van gister vir probleme van die hede dae

Witman werkloos, witman ambisieloos

Witman staar die mure plat met grafte in sy oë

Witman gaan siel verloor, witman gaan familiemoor

Witman heelnag wakker soos ‘n lewendige lyk

Witman se rewolwer lê gereed onder sy kussing

More oggend vroeg skiet hy sonder om te kyk KYK

“TienerAngs” en “Lied van die nuwe jong Suid-Afrika” verpulp elke been in jou lyf. Jy kan egter nie ophou luister nie. WORD WAKKER. WORD WAKKER – dis die woorde wat bly kriewel. Dan is daar nog “Doodstraf” en “Kinderhel”. GENUGTIG. Dit voel of jou senuwees onder jou vel met ‘n warm vurk uitgekerf word.

Dan’s daar “Huigelaar” – ‘n duidelike vingerwysing na mense wat gospelmusiek doen net om stinkryk te word.

Kom kyk na my konsert

My skynheilige skouspel

Die skamele honderd rande werd

Ek preek die nuwe testament met ‘n rock en roll gebed

Net 999neëntig op ‘n CD of kasset

Koop! Koop! Koop! My woorde soet soos stroop

Die show wat ek hou sal verlossing bring vir jou

Kom! Kom! Kom! Gehoorsaam my gebod

Ek is ‘n selfvoldane sot soos ‘n Christen vermom

Ek loof die naam van Jesus

Met ‘n juigende kitaar

Die kamera streel sagkens oor my plastiese gelaat

Agter sneeuwit Armani skuil die hart van ‘n huigelaar

Koop! Koop! Koop! My DVD hoop

Ek wil ‘n groot nuwe huis bou, betaal deur jou

Gee! Gee! Gee! Ek soek ‘n nuwe BMW

Om al die geld wat ek kry na die bank toe te karwei

“Maar wag, dis nie al nie, luister nou na dié aanbod.

Koop my plaat voor eind-Oktoberrrr, kry ‘n kleurplakkaat van God!!”

Die duiwel is verslaan

Almal wat my CD koop kan hemel toe gaan

Ek preek die blye boodskap met ‘n rock en roll gebed

Net 999neëntig op ‘n CD of kasset

Kom kom kom! Huigelaar!

Koop koop koop! Huigelaar!

Kom kom kom! Huigelaar!

Kom kom kom gehoorsaam my gebod

Ek is ‘n selfvoldane sot soos ‘n Christen vermom!

Voel hoe die spinnerakke in jou oordromme verdamp, terwyl jy met 'n droë strot saamskreeu tot jy op jou knieë voor die luidsprekers rondkruip, snaakse kermgeluidjies maak en op jou rug omdop omdat jy doodeenvoudig net nie meer kan nie.

Vrydagaand begin hulle Siviele Ongehoorsaamheid toer. Kry dus jou agterent voor 21:00 by Hidden Cellar in Stellenbosch sodat hulle elke klontjie amalgaam uit jou agtertande kan ruk.