Adam Small vereer in die Kunstekaap

  • 0

Op Saterdag 16 Desember 2017, Versoeningsdag, is ’n borsbeeld van Adam Small in die Marmerfoyer van die Kunstekaap-teaterkompleks onthul.

Die beeld is geskenk deur die Stigting vir Bemagtiging deur Afrikaans (SBA) en is ontwerp deur Johannes du Plessis (regs). Henry Haynes (links) het die beeld gegiet.

Terselfdertyd is ’n splinternuwe boek, Adam Small: Denker Digter Dramaturg, onder redaksie van Jacques van der Elst, ook bekendgestel. Dit word deur Protea Boekhuis uitgegee.

Celeste Reynolds, Kunstekaap se argivaris, het ’n uitstalling geskep getiteld "Adam Small: Digter, skrywer en menseregtestryder". Dit hang ook in die Marmerfoyer en is oop vir enige lid van die publiek om te besoek.

Small het ’n lang verbintenis met die Kunstekaap. In 1974 het Pieter Fourie die regte bekom om Small se drama, Kanna hy kô hystoe in die Nico Malan Skouburg op te voer, soos die Kunstekaap toentertyd bekend gestaan het.

Bruin mense is nie in die teater toegelaat nie, en slegs wit akteurs kon in die stuk speel. Small self sou nie die vertoning kon bywoon nie, maar die administrateur van die Wes-Kaap, AH Vosloo, het ingegryp en het vir Small en sy vrou, Rosalie, persoonlik genooi.

Small het die uitnodiging van die hand gewys uit protes teen die Apartheidsbeleid.

Small se besluit het soveel opspraak gemaak dat die Nico Malan in 1975 vir alle rasse oopgestel is – iets wat ongehoord was in die jare van Apartheid. Small en sy vrou was onder die eerste bruin mense wat die skouburg amptelik besoek het.

In 1996 is Small aangestel as voorsitter van die destydse Kaapse Raad vir Uitvoerende Kunste.

Marlene le Roux, hoof van die Kunstekaap en voorsitter van die SBA, het almal verwelkom.

Jacques Van der Elst van die Suid-Afrikaanse Akademie vir Wetenskap en Kuns, het kortliks vertel hoe die nuwe boek, Adam Small: Denker Digter Dramaturg tot stand gekom het.

Michael le Cordeur het daarna namens die SBA oor Adam Small se werk gepraat. Hy het afgesluit met: “Nou kyk, vrinne, in my hand is ’n glas. Kô lat ons drink op Adam Small!”

Juliana Smith, ’n jare lange vriend van die Small-egpaar, het namens Rosalie Smit, die weduwee van Adam Small, almal bedank. Small sou self die onthulling waargeneem het, maar sy het siek geword. Smith en Marlene le Roux het toe die onthulling behartig, met Anroux Marais wat bygestaan het.

HemelBesem het toe sy lied, “Die Ballie” (opgeneem in sy boek God praat Afrikaans, uitgegee deur LAPA Uitgewers), voorgedra, want, sê HemelBesem, hy beskou Small as die vaderfiguur wat dit vir ander kunstenaars moontlik gemaak het om in die Afrikaans van Simon Witbooi Senior, HemelBesem se eie pa, op te tree.

Daarna het HemelBesem, die kunstenaar Hilton Mandela (’n finalis van ATKV-Crescendo) en die kitaarspeler, Stuwi W, drie van Small se gedigte uitgevoer.

Anroux Marais, minister van sport en kultuur in die Wes-Kaap, het kortliks na die kunste in die algemeen verwys as ’n medium tot versoening en nasiebou.

Hieronder is enkele foto’s wat die uitstalling oor Adam Small se verbintenis met die Kunstekaap uitbeeld, saamgestel deur Celeste Rynolds. Die publiek kan dit gaan besigtig.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top