Wêreldwye Woordeboekmaand is amper verby. Naomi Meyer het vir Willem Botha oor hierdie bewustheidsmaand gevra.

Willem, dis Woordeboekmaand. Wêreldwyd. Wat beteken dit op praktiese vlak?

Ons probeer mense bewus maak van watter wonderlike woordeboeke daar beskikbaar is – verskillende woordeboeke vir mense se verskillende behoeftes. Van mense wat ’n taal wil aanleer tot mense wat op soek is na baie spesifieke rekenaarterme. Jy moet net die regte woordeboek vir jou behoefte vind. Elektroniese woordeboeke kan binne ’n oogwink verstommende soektogte uitvoer.

Jy sê dat “Borg ‘n Woord” een van die lewenslyne is waarsonder julle nie meer kan nie. Is daar in hierdie knap ekonomiese tye iets anders wat mense kan doen as hulle nie R5 000 vir een woord het nie? Wat kan mense vir die WAT doen?

Jy kan ook ’n woord vir R100 borg en dalk R25 000 in die prystrekking wen. En jy kry ’n sertifikaat met jou naam en woord of woorde daarop. Streektaalwoorde en -uitdrukkings kan gerus aan ons gestuur word. Dit is vir ons net so belangrik soos Standaardafrikaans.

Vanjaar is die beskermvrou van die projek Marita van der Vyver: Hoe bepaal julle wie elke jaar die beskermheer of beskermvrou van die projek is?

Dit moet iemand met ’n hoë profiel wees vir wie Afrikaans belangrik is en wat reeds ’n vriend van die WAT is. Sulke mense kom op merkwaardige wyses oor ons pad.

Lees hoe Marita van der Vyver woorde help borg.