Die afgelope ruk het ons die geleentheid gehad om spirituele intelligensie prakties hier op die Sê gedemonstreer te sien. Dit het plaasgevind tydens die gesprek oor die sigbaarheid van Jupiter se mane en die selfverklaarde spiritueel intelligente KdK se onvermoë om deur sy spiritueel intelligente bril die mane raak te sien.

Die debat moes eintlik nooit plaasgevind het nie omdat enigiemand wat al ooit deur ’n teleskoop, of selfs ’n verkyker, na die hemelruim gekyk het, sal bevestig dat Jupiter se mane inderdaad sigbaar is. Spirituele intelligensie tas klaarblyklik mens se sintuie aan want dis slegs dié onder ons wat verklaar dat hulle oor spirituele intelligensie beskik, wat die mane nie kan raaksien nie. Die mane se bewegings om Jupiter is al deur die eeue deur verskeie mense waargeneem en die posisies van die mane is sorgvuldig aangeteken. Uit die data wat versamel is, is ’n teorie oor die beweging van die mane om Jupiter geformuleer en daar is dan ook met behulp van hierdie teorie voorspel hoe die mane in die toekoms gaan optree. Nog nooit was die teorie verkeerd nie en dié teorie is ’n sterrekundige feit net soos die rotasie van die aarde en ’n klompie ander planete om die son ’n feit is (’n feit wat natuurlik ook deur die spiritueel intelligente ene hier op die Sê bevraagteken is!). Dis maar hoe die wetenskap werk – dit verklaar en dit voorspel. As daar diskrepansie aangeteken word tussen die teorie en nuwe waarnemings word die waarnemings vir foute nagegaan en as daar geen foute is nie word die teorie verstel om al die vorige waarnemings en die nuwe waarnemings te verklaar. In die geval van die beweging van die mane om Jupiter bevestig die mane se beweging die gevestigde teorie en is almal behalwe die Sê se een spiritueel intelligente deelnemer tevrede.

Die spiritueel intelligente ene kan kwansuis glad nie die mane sien nie – wat staan nog hulle beweging aanteken! Omdat hy niks kan sien nie kan hy dus geen data versamel nie en kan hy dus nie met ’n alternatiewe teorie vorendag kom wat verklaar en voorspel nie. Die arme Pluto, wat nie meer aan die nuwe definisie van ’n planeet voldoen nie, word nou sommer ook bygesleep om gewig aan sy onvermoë om Jupiter se mane raak te sien, te verleen. Ek vermoed natuurlik baie sterk dat die spiritueel intelligente ene nog nooit deur ’n teleskoop gekyk het nie en homself nou in kookwater bevind met sy kleipratery.

My finale analise: dit wil voorkom of sterrekunde, en spirituele intelligensie wedersyds uitsluitende begrippe is.

Groetnis
Thomas