2018-Oorlewingsgids: agt volhoubare gesonde eetgewoontes

  • 0

Uit die meeste mense se ambisieuse Nuwejaarsvoornemens blyk dit dat hulle baie bewus is van hul gewig en eetgewoontes. Ongelukkig spruit dit meestal voort uit die sosiale media se druk om die ideale gewig te hê en ook gemengde seine wanneer produkte bemark word as laag in vet, hoog in koolhidrate, laag in kilojoules, hoog in vesel, hoog in energie, ryk aan omega 3- en 6-vetsure, laag in versadigde vette, ryk aan proteïen of glutenvry.

Met die ontwikkelende mediese tegnologie is intoleransies (bv gluten en laktose) makliker om te identifiseer en allergieë toenemend makliker om te bestuur met al die alternatiewe produkte wat beskikbaar is. Selfs vir mense met hoë bloeddruk, cholesterol en diabetes is daar alternatiewe om seker te maak hulle het kos om te geniet.

Tim Noakes se banting, hoewel omstrede, het verskeie suksesverhale opgelewer en supermarkte se room, Griekse jogurt en botter het soos soetkoek verkoop. Daar is diëte met die doel om jou liggaam te detoksifiseer en ander wat bepaal word deur jou ouderdom, jou liggaamsmassa-indeks, hoe aktief jy is en selfs jou bloedgroep. Daar is benaderings wat vrugte- en groente-smoothies of varsgeperste sappe aanbeveel, ander wat van maaltydvervangings gebruik maak en natuurlik ook die meer onlangse "clean eating" van onverwerkte, organiese en rou kosse.

Sommige mense pak leefstylveranderinge alleen aan, ander saam met hul gesinne (met wisselende vlakke van geesdrif), en ander saam met organisasies soos Weigh-Less, SureSlim en Happy Shrinkers.

Hollywood-filmsterre deel ook hulle wenke, soos om meer gereeld kaal te wees en daardeur ’n groter bewustheid van jou liggaam te hê (model Marisa Miller), om in koue water te stort (Liv Tyler), om ’n korset te dra (Kim Kardashian), om meer alkaliese kosse te eet (Elle Macpherson), en ’n daaglikse inname van appelasyn (Heidi Klum).

In die warboel van eetwenke wat nie alles ewe betroubaar en goed nagevors is nie, kan ’n gesonde eetplan soos ’n onbegonne taak voel. Soos gym-bywoning, is dit ook nie altyd volhoubaar nie.

Hier is agt volhoubare wenke vir mense met verskillende voedselvoorkeure, intoleransies of allergieë, en selfs vir mense met min tyd wat sukkel om tyd aan elke maaltyd af te staan.

1. Rou groente en vrugte is gesonder as wanneer dit gaar of verwerk is. Voedingstowwe gaan verlore en onnodige sout en ander stowwe word bygevoeg. Die goeie nuus is dat dit minder moeite is om dit rou te eet! Gooi dit in ’n smoothie, doop dit in humus of sit dit in ’n slaai. Wees wel versigtig vir versapping, aangesien vesel daardeur verlore gaan.

2. Maak jou kos self gaar en maak jou eie sous eerder as om klaargemaakte souse of kitsmaaltye te eet. Op daardie manier kan jy beheer wat uiteindelik in jou bord beland en is jy nie uitgelewer aan onnodige byvoegings soos preserveer-, geur- of kleurmiddels nie. Om dit makliker te maak, kan jy aftreksel (met gaar hoender, wortels, seldery, uie, ens) en ander souse in grootmaat voorberei en in porsies vries.

3. Jy kan ’n gebalanseerde dieet volg deur ’n verskeidenheid van verskillende kosse te eet en nie ’n hele voedselgroep uit te skakel nie. Matigheid is wel altyd belangrik – maak seker jou porsiegroottes is in verhouding tot hoe gesond die kos is.

4. Moenie laatoggend ’n kolwyntjie eet en besluit om die res van die dag te eet wat jy wil omdat jy nou in elk geval klaar gekroek het nie. Eet koek en geniet dit, maar maak dit dan doel om die res van die dag mooi te kyk na wat jy eet.

5. Eet voordat jy jou kosinkopies gaan doen. Wanneer jy honger is en deur die supermark loop, lyk alles lekker en pak jy enigiets in jou waentjie.

6. Beplan jou maaltye en maak etes vooruit. As jy byvoorbeeld vleis en groente vir aandete maak, maak genoeg sodat jy die res die volgende dag vir middagete kan eet. Sodoende het jy twee gesonde maaltye met die voorbereidingstyd van een en hoef jy nie te swig voor kitskos vir middagete nie.

7. Wanneer jy uiteet of wegneemetes eet, kies slim. As die kelner vra "Chips or salad?", kies maar die slaai. Dis net erg totdat dit ’n gewoonte raak. Kies maar die klein pizza eerder as die grote en eet dan ’n vrug as jy nog steeds honger is en jou gewete wil sus.

8. Pinterest! Pinterest is vol idees vir vinnige maaltye en maklike resepte, en sodra jy besluit het watter benadering tot kos jy hierdie jaar wil volg, is daar ’n magdom opsies om van te kies. Stoor dit op jou selfoon en maak dit in die winkel oop om te sien watter bestanddele jy moet koop.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top